ಪಾತ್ರ

ಆಸ್ಪತ್ರೆ

-----

ಪ್ರಕೃತಿಯ ವಿಕೋಪಕ್ಕೆ,

ನರರ ಹೀನ ಕೃತ್ಯಕ್ಕೆ,

ದೈವದ ಹೊಡೆತಕ್ಕೆ,

ಬಲಿಯಾದ ನರರ ಬಾಳಿನದೊಂದು

ಆಶಾ ಸೌಧ - ಈ ಆಸ್ಪತ್ರೆ

ಯಮನ ಜೊತೆಗಿನ ಸಮರದಿ ಸೋತವರ,

ಬದುಕುವ ಆಸೆ ಹೊತ್ತ ಶವಗಳ ಸನೀಹದವರ

ನೊಂದ ಹೃದಯಕ್ಕೆ ಕಣ್ಣೀರಿಡದೆ

ಬರೀ ದಿಗ್ಭ್ರಮೆಯ ನೋಟ ಬೀರುತ್ತ,

ತನ್ನೊಳಗೆ ತಾ ಕುಸಿಯದೆ ನಿಂತ

ಜೀವಂತ ಸ್ಮಾರಕ - ಈ ಆಸ್ಪತ್ರೆ

ರೋಗಿ

------

ಬದುಕಿನ ಆಗರದಿ ತೇಲಿ ತೇಲಿ

ಸುಳಿಗೆ ಸಿಲುಕದೆ, ನೆರೆಗೆ ಅಳುಕದೆ

ಪ್ರವಾಹದ ದಾಳಿಗೆ ಸೋಲದೆ

ದಡ ಸೇರಲು ಹೊರಟ

ಅಂಗಹೀನ ಪ್ರಾಣಿ - ಈ ರೋಗಿ

ಸತ್ತ ದೇಹದಿ ಜೀವನ ಬೀಜ ಬಿತ್ತಿ

ಮತ್ತೆ ಹಸಿರುಗನಸನು ಕಾಣುವ

ಸ್ವಪ್ನಲೋಕಿ - ಈ ರೋಗಿ

ನಾಲ್ಕು ಗೋಡೆಗಳ ನಡುವೆ

ಜೀವಗಾಳಿಯನು ಬಯಸಿ

ನಿಟ್ಟುಸಿರು ಹಿಡಿದು

ಬದುಕುವ ಜೀವಿ - ಈ ರೋಗಿ

ವೈದ್ಯ

-----

ಜೀವದಾಸೆಯ ತೊರೆದು ಬಂದಿಹ ಜೀವಕ್ಕೆ

ತನ್ನ  ಮಾತಿನ ಶುಷ್ರುಶೆಯ ನೀಡಿ

ಮಡಿದ ಸಸಿಗೆ ಮತ್ತೊಮ್ಮೆ ಕಸಿ ಮಾಡುವ

ಇಚ್ಛೆ ಹೊತ್ತ ಕೃಷಿಕ - ಈ ವೈದ್ಯ

ಹಣೆಯ ಕೆಂಪು ಮಾಸಿದ ಹೆಣ್ಣಿಗೆ

ಮತ್ತೆ ಹಸಿರ ಉಟ್ಟು-ತೊಟ್ಟು

ನಲಿವ ಸೌಭಾಗ್ಯ

ತಂದವನಂತೆ - ಈ ವೈದ್ಯ 

                   -- ಕಲ್ಯಾಣ ಕುಲ್ಕರ್ಣಿ